5.TimeBoxing – Agileافكار لتطبيق ال

عشان احنا في شغل الAgile مهتمين جدا بالسرعة و اننا نطلع جزء شغال من الsoftware بتاعنا عشان ناخد عليه feedback بدري ، يبقي لازم نهتم جدا اننا منضيعش وقت .

فكرة الTimeboxing هي اننا نحط حد اقصي للوقت اللي ممكن تاخده Activity او Task معينة ، خصوصا لو الحاجة دي ممكن تفتح مننا او نسرح و نضيع فيها وقت ، زي اجتماع ممكن نرغي فيه في تفاصيل مش مهمة  او Bug ممكن نقعد ندور فيها مدة طويلة او Investigation task ممكن تقعد ايام

و هنا فكرة الTimeboxing بتخلي الناس تركز اكتر علي هدف قصير المدي ، بيخليهم دايما يفكروا هو اللي انا بعمله دلوقتي في الاتجاه الصح ولا بيضيع وقت ، بيخليهم يقللوا الوقت اللي عطلانين فيه و مستنيين حد تاني علي قد ما يقدروا يا اما يلاقوا طريقة ميتعطلوش بيها او انهم يفهموا اللي معطلهم انه مترتب عليه حاجات تانية هتتاخر. من الاخر الشغل بيكون فيه تركيز اعلي بكتير.

و بعد ما الtimebox بيخلص لو الشغل لسه باقي بنقف و نشوف ليه و هل محتاجين نكمل نفس الحاجة و لا اخدت اكتر من وقتها ، ولا هل المفروض نغير الطريقة اللي ماشيين بيها ولا ايه، ممكن نختار نكمل و ندي Timebox تاني بس هنكون منعنا ان حد يسرح او حاجة تاخد اكتر من وقتها.

اول Timebox بنشتغل بيه هي الIteration نفسها ، فكرة اني اخلي الفريق كله مركز علي هدف انه يطلع جزء شغال  و لو صغير في وقت اسبوعين مثلا بيعلي تركيز و تعاون الفريق بشكل كبير .

تاني حاجة مهمة جدا هي الTimeboxing في الاجتماعات ، خصوصا اللي بيكون حاضر فيها الفريق كله ، لازم نكون محددين هدف واضح من الاجتماع ده و نطلع بActions او Tasks نشتغل عليها و الا هنضيع وقت الفريق كله في رغي،و كمان الاجتماع لازم يبقي ليه Timebox علشان الناس متسرحش او يبقي كله احاديث جانبية و نقدر نحقق هدف الاجتماع ، و اكبر مثال علي الtimeboxing في الاجتماعات هو الDaily Standup meeting اللي بنحطله Timebox ربع ساعة و كمان بنخلي الناس واقفين عشان ميعدوش الوقت ده، و مش بس في الDaily Standup اي اجتماع لازم يبقي ليه Target و timebox عشان منضيعش وقت الفريق.

و طبعا لا زم نفرق بين اني احط Timebox لحاجة و اني اضغط وقتها او اني اعملها اي كلام عشان الTimebox ، الهدف هنا اني ازود التركيز و ابسط الشغل و اقلل الوقت العطلان اكتر من هدف ان الحاجة تاخد وقت اقل ، يعني مينفعش اخلي الفريق مش فاهم تفاصيل الfeature اللي هيشتغل عليها بس ينفع اخليه ميتكلمش في تفاصيل ملهاش لازمة او مش هنعملها دلوقتي ،  مينفعش اطلع feature كلها bugs بس ينفع اعملها بشكل بسيط بس الquality بتاعته كويسة.

و في الاخر الفرق اللي شغالة Agile لازم تاخد الtimeboxing ده اسلوب حياة عشان يتعودوا يركزوا علي هدف الشغل في وقت قصير .