ازاي تقدر تحسن الشغل حتي لو لوحدك
امبارح حضرتLeading Positive change without Authority Meetup ل Agile Egypt عن ازاي نقدر نسرع و نحسن شغلنا حتي لو لوحدنا و بقية الشركة او حتي الفريق مش معانا .
اللي كان بيدينا الsession هو Amr ElSsamadisy و هو من الناس اللي عندها خبرة عظيمة في الsoftware و الAgile و بيشتغل فيه من حوالي 20 سنة في امريكا و مصر.
قبل ما نتكلم عن ايه اللي المفروض نعمله و ايه الAgile Practices اللي هنطبقها عمرو عملنا exercise لطيف هو سؤال للتفكير : لو نفس الفريق عمل نفس المشروع بالظبط مرتين ، هياخد منهم وقت قد ايه مع الفرض اننا هنعيد كل حاجة من الاول و مش هنستخدم اي حاجة من القديم .
تراوحت الاجابات بين ثلث الوقت او نصه او قده او اكتر شوية ، بس في الاخر اللي كان بيقول اقل قال عشان الناس اتعلمت حاجة من المشروع الاول ، و اللي قال اكتر كان عشان الناس لو مش ماشية بنظام يركز علي التعليم هيقعوا في نفس الاخطاء و مش هيتعلموا.
و هي دي اول فكرة ، اننا نركز علي التعليم و اننا نسرعه و نعمل نظام يخلي عملية التعليم اساسية في الشغل ، سواء التعليم في الtechnology ، او في احتياجات العميل و مجاله او في تعامل الفريق مع بعض. بغض النظر هنسمي الطريقة دي Agile ولا لا ، هدفنا في الاخر نتعلم عشان نسرع الشغل.
اتكلمنا عن افكار practices ممكن نعملها لوحدنا او نعدل فيها عشان تناسبنا ، اولها كان الWork In Progress Limits (WIP) و ده فكرته اننا نقلل الحاجات اللي شغالين فيها بالتوازي مع بعض و نشتغل في حاجة ورا حاجة عشان نقدر نخلص الشغل بتركيز و بسرعة مش ابقي شغال في كل حاجة و لا واحدة فيهم بتخلص . و ده ممكن يطبقه كل واحد لوحده حتي لو علي مستوي الtasks ، و بكده اقدر اخلص شغلي اسرع و اسلم اهم task الاول و هيكون بتركيز اعلي و اكيد quality اعلي.
تاني فكرة هي الestimation boards ، و هي معتمدة علي فكرة الrelative estimation و هي اني اقارن الtasks ببعضها و اشوف الestimate بتاعها حوالي قد ايه ، و ابني history عندي بالحاجات اللي عملتها و اخدت وقت و مجهود قد ايه في الestimation board عشان اعرف اقارن بشكل احسن و ادي estimates افضل
اتكلمنا كمان عن فكرة الpersonal agility و ان الشخص يبقي بيفكر بمبادئ الAgile و يدور انه يكون بيتواصل كويس مع الفريق بتاعه و انه فاهم ان الاخطاء دي فرصة للتعليم مش بيدور علي اخطاء غيره و يشاور عليها عشان يطلع نفسه احسن من الناس و يبقي بيهتم بالtransparency بين الفريق مش بيخبي معلومات تفيد المشروع و بينقل status حقيقية عن الشغل حتي لو فيه مشكلة و انه يكون فاهم ان النجاح بيكون للفريق كله و مش بيبخل بمساعدة .
فيه افكار كمان عن الtechnical practices و ازاي الواحد ممكن يبدا يعملها لوحده زي الcontinuous integration و ال Code Refactoring او الTesting automation.
في الاخر اتفقنا ان طبعا لو قدرنا نشجع الفريق انه يشتغل معانا بالطريقة دي هتكون النتايج احسن كتير ، ولكن حتي لو فيه معوقات انك لوحدك و محدش مقتنع تقدر تعمل حاجة positive و تتعلم و تسرع الشغل ، هتتعب شوية في الاول و ممكن ده يبقي علي حساب وقتك بس هتسرع في الاخر كتير و الquality هتكون احسن و كمان ساعتها الفريق و المدير هيعرفوا قيمة اللي عملته و يتحمسوله.
