Agile مقاومة الفريق – تحديات
طالما اتفقنا ان ال(Agile) ده طريقة تفكير ، فالتحديات في تطبيقه معظمها بتكون تحديات تغيير طريقة التفكير سواء للفريق او الادارة او العميل ، و اقناعهم ان الطريقة دي انسب لشغلنا في ال(software) و انها هتحقق نجاح اكبر للمشروع و هيتسلم في وقت كويس و Quality كويسة و العميل هيكون معاه Valuable Software و راضي عنه ،الموضوع مش (tool) جديدة هنستخدمها ولا (process) بنتطبق خطواتها و خلاص.
و الحقيقة عشان نوصل لده لازم نكون فاهمين كويس قيم ال(Agile) و عارفين تاثير تطبيقها علي نجاح المشروع عشان يبقي عندنا استعداد اننا نحط مجهود و وقت في تطبيقها و صبر لحد ما نتمكن من تطبيقنا خصوصا تحت ضغط الشغل الطبيعي.
من التحديات اللي بتقابلنا هي مقاومة الفريق لتطبيق الAgile و ده بيكون طبيعي لاننا بنغير نظام الناس متعودين عليه و بياثر علي حياتهم اليومية.
اول تحدي هي ان الفريق يبقي متحمس لتغيير نظام شغله و متقبل ليه و فاهم قيمته مش شايف ان دي حاجة ملهاش لازمة مفروضة علينا و خلاص ، ده غير انهم يبقوا عندهم استعداد يتعلموا اكتر و يصلحوا من اخطائهم و يبقوا مسئولين عن شغلهم و يتعاملوا مع بعض ، و كمان الادارة يبقوا واثقين في الفريق و بيدعموه و فاهمين قيمة التغيير اللي بيعملوه.
عشان كده لازم الفريق كله يتعلم (Agile ) و يفهم كويس القيم و المبادئ عشان هيطبقها كل يوم في شغله ، و هيتعاونوا سوا انهم يطبقوها و هيفكروا بعض بيها و خصوصا انهم هدفهم انهم يوصلوا انهم يبقوا Self Organizing Team
في الاول بيكون الفريق مش متعود انه يشتغل مع بعضه بشكل يومي و بيبقي فيه resistance انهم يتكلموا مع بعض اكتر و يتناقشوا في التفاصيل و الاكتر لما يبداوا يسالوا بعض طيب انت بتعمل كده ليه و يقترحوا طريقة تانية ، فيه ناس ممكن تاخد ده بشكل شخصي في الاول لحد ما تفهم ان ده العادي و انه مصلحة الشغل و بيحصل مع الكل ، الكبير قبل الصغير.
كمان في الاول الناس ممكن تحس انها مش عارفة تشتغل بالاسلوب السريع ده و انها المفروض كل يوم تتكلم عن شغلها في ال Daily Standup meeting و تحس باحباط ، بس لازم الناس تفهم انهم هيوصلوا واحدة واحدة و طبيعي الدنيا تكون ملخبطة في الاول ، للوصول للSelf Organizing Team بيمر الفريق باربع مراحل Forming , Storming ,Norming and Performing ، و ده بياخد وقت و اصرار و ثقة و دعم من الادارة .
من الحاجات المهمة كمان مبدآ Inspection and Adaption و اننا نتكلم عن مشاكلنا و أخطائنا و نحطلها حلول ، فيه ناس مش متعودة تتكلم عن المشاكل و خصوصا لو قدام المديرين لو ثقافة الشركة مش بتسمح بده ، او ناس مش بتحب تعترف بغلطها او ان هي عندها نقص في المعرفة حتي لو ظروف المشروع اجبرتهم علي كده ، كل ده محتاج انه يطبق بدعم من الادارة و تقبل من الفريق لحد ما يبقي الطبيعي .
من التحديات كمان ان الفريق يتكلم مع الناس بتوع الBusiness و يتعلم ايه المناسب للمشروع مش يقول ايه وجعغفلك الدماغ ده انا ليا الTask بتاعتي اخلصها و خلاص .
و طالما الفريق بيفهم المشروع و بيبقي عنده دعم و ثقة من الادارة متوقع منه مسئولية و التزام اكبر ناحية المشروع ، تاني هو مش كل واحد بيخلص Task و ملوش دعوة بعد كده ، لا ده مسئول مع بقية الفريق انه يعمل ما في وسعه ان الشغل يتسلم و يساعد بقية الفريق و يركز مع المشاكل و يحاول يحلها و يلتزم مع بقية الفريق بالخطوات اللي تحل مشاكلهم.
و تاني نرجع و نقول اهم الحاجة عشان نقلل مقاومة الفريق ان الناس تفهم قيمة التغيير ده علي الشغل و عليهم بشكل شخصي و انهم هيكونوا فريق ناضج و ناجح اكتر و كمان يفهموا انهم في رحلة تغيير و يبقوا عارفين انه في مصلحتهم و انهم ممكن يغلطوا طالما هيتعلموا و يطوروا من نفسهم .
وكمان اتكلمنا عن مقاومة المدير للتحديات التانية
لو حاولت تطبق الAgile و قابلك تحدي مختلف مع الفريق ممكن تشاركنا بيه 🙂
