Agile مقاومة المدير – تحديات

طالما اتفقنا ان ال(Agile) ده طريقة تفكير ، فالتحديات في تطبيقه معظمها بتكون تحديات تغيير طريقة التفكير سواء للفريق او الادارة او العميل ، و اقناعهم ان الطريقة دي انسب لشغلنا في ال(software) و انها هتحقق نجاح اكبر  للمشروع و هيتسلم في وقت كويس و Quality كويسة و العميل هيكون معاه Valuable Software و راضي عنه ،الموضوع مش (tool) جديدة هنستخدمها ولا (process) بنتطبق خطواتها و خلاص.

 و الحقيقة عشان نوصل لده لازم نكون فاهمين كويس قيم ال(Agile) و عارفين تاثير تطبيقها علي نجاح المشروع  عشان يبقي عندنا استعداد اننا نحط مجهود و وقت في تطبيقها و صبر لحد ما نتمكن من تطبيقنا خصوصا تحت ضغط الشغل الطبيعي.

و هنا بنتكلم علي مقاومة المدير و هو الشخص المسئول عن فريق التسليم او مدير الشركة او اي حد في ايده قرار الناس تشتغل ازاي

و المدير ممكن يقاوم تطبيق الAgile في اكتر من مرحلة ، اولا مرحلة اختيار تطبيق الAgile لانه ممكن يكون مش عايز يغير طريقة الشغل او مش مقتنع ان التغيير للAgile هو الحل لمشاكل التاخير او تغييرات العميل او الestimates المش مظبوطة ، بيكون مثلا الحل عنده ان الناس تحاول انها تفهم الrequirements اكتر عشان منغيرش حاجة او ان الناس تتعلم تعمل estimates مع انهم معندهمش تفاصيل كفاية .

او ممكن يكون المدير جرب يشتغل Agile قبل كده بس كان التطبيق مش مظبوط او الوقت قليل فاقتنع ان الAgile مش مناسب ليه او مش هيديله النتيجة المطلوبة.

او ممكن يكون مش عارف عن الAgile اصلا بس اللي بيقترح عليه التطبيق معرفش يوصله القيمة اللي هتعود علي الشركة من تطبيقه، يعني لو بتقترح علي مديرك تشتغلوا Agile عشان هو ده الجديد و المنتشر و هو ده احسن حاجة الناس بره بتشتغل بيها مش هيبقي متحمس قوي ، هتبقي فكرة ظريفة لما يبقي عندنا وقت نبقي نشوفها.

انما لو قلتله ان الطريقة دي هي اللي هتخلينا نقدر نتعامل من التغييرات بشكل افضل و بتكلفة اقل زي ما اتكلمنا في فكرة Responding to change و ازاي ده يخلينا نوصل لثقة و رضا العميل بشكل احسن ، او اننا نقدر ننمي الفريق و يكون متعاون و يوصل لمرحلة انه يكون Self Organizing و مش محتاج مجهود كبير في ادارته و متابعته، اكيد هيحس بقيمة الشغل الAgile و يكون متحمس اكتر بكتير لتطبيقه و انه يدي الفريق الدعم و الثقة المطلوبين.

المرحلة التانية هي مرحلة بداية التطبيق ، ان المدير اولا يفهم ان الفريق كله لازم يفهم Agile عشان يعرف يشتغل صح و ثانيا لازم يفهم تطبيق الAgile بياخد وقت عشان الفريق يتعود و يبدا ياخد نتائج كويسة و ان المدير لازم يفضل يدعمهم في الاول حتي مع اللخبطة لحد ما يقدروا ينظموا شغلهم و يبقوا فعلا Agile .

المرحلة التالتة هي مرحلة الضغط ، ممكن لما بيحصل ضغط في المشروع او في ظروف الشركة ، المدير يقول متركزوش بقي في موضوع الAgile و يرجع للطريقة القديمة عشان فاكر انه هيقدر ينقذ الدنيا ، يعني مثلا اننا نقعد نتنقل بين الfeatures و منركزش اننا نطلع بworking software  او اننا نبطل نعمل inspection and adaption و منقفش نشوف احنا في الطريق الصح او ممكن نحسن ايه ، و كده ممكن نخسر اللي الفريق اتعلمه ده غير اننا بنخسر اننا بنرجع تاني للاخطاء اللي خلتنا نروح للAgile و كمان في وقت حرج في المشروع.

عشان كده مهم قوي ان المدير يكون فاهم كويس قيم الAgile  عشان ده بيساعد جدا في نجاح الفريق بدعمه.

هنا بنتكلم عن مقاومة الفريق

لو جربت تشتغل Agile  و واجهك تحدي مختلف ممكن تشاركنا