Agile ليه تشتغل

طيب لو حاولنا نفكر ايه اللي ممكن يخلينا نغير الطريقة اللي بنشتغل بيها و نشتغل Agile ؟

هل عشان ده الجديد و كل الشركات الكبيرة شغالة كده ؟ ولا عشان يبقي شكلنا حلو و شيك ؟ ولا عشان عندنا مشاكل و لما نشتغل Agile هنلاقيلها حل ؟

طيب عشان ناخد القرار ده لازم الاول نعرف يعني ايه Agile ؟ هي certificate بناخدها ولا process بنطبقها ولا tool بنستخدمها  ولا هي اسلوب ادارة ولا ايه ؟

اهم حاجة لازم نعرفها و نفهمها هي ان Agile is a mindset يعني هي طريقة تفكير او طريقة شغل ، و معني كده ان بيتبناها الفريق كله مش بس الادارة ولا الناس الtechnical بس .

طيب الmindset دي بتتكلم عن ايه ؟ الmindset دي اساسها ان الsoftware منتج فكري (معتمد علي مجهود ذهني اكتر من الالات او ال process ) صعب انك تعرف كل ابعاده او تعرف اللي هيلبي احتياجات المستخدم من الاول ، لازم نعمل حاجة و نستخدمها و نطور فيها كل شوية . يبقي التغيير هنا حاجة اساسية و طبيعية و ده اول سبب يخلي الناس تشتغل Agile ، لو عندك سوق بيتغير او عميل بيشوف حاجة و يعدل فيها او requirments مش كلها واضحة من الاول  يبقي تشتغل Agile.

و طالما قلنا ان الsoftware منتج فكري ، يبقي اهم حاجة عشان المنتج ده يطلع كويس هو الاشخاص اللي بيشتغلوا عليه ، و الAgile Mindset بتركز جدا علي ان الاشخاص دول يتعلموا كتير ، يعرفوا اكتر عن المشروع و الbusiness بتاعه و مين هيستخدمه ، و يتعلموا عن الtechnologies و ازاي يستخدموها انهم يسرعوا شغلهم ، و يعرفوا اكتر ازاي يشتغلوا مع بعض و يحلوا مشاكلهم ، يعني لو عندك فريق و عايز انهم يتطوروا و يحلوا مشاكلهم و نركز علي تعليمهم يبقي تشتغلوا Agile.

طيب هنلاحق التغييرات الكتير ولا نركز علي تعليم الفريق ولا نطلع شغل اصلا ؟ يبقي لازم نشتغل بسرعة و تركيز عالي و نجرب عشان نتعلم ، عشان كده الAgile Mindset بتركز علي اننا نشتغل في iterations و ناخد feedback و نتعلم حاجة جديدة و نطلع جزء من الشغل في كل iteration . يعني لو مش عارفين نلاحق علي الشغل و التغييرات و الاولويات و الفريق مش بيتعلم من كتر الضغط يبقي نشتغل Agile.

و طالما بنشتغل علي حاجات متغيرة و معانا فريق من افراد مختلفين يبقي لازم تقابلنا مشاكل ، ال Agile Mindset بتركز علي الtransparency و اننا نقدر نتكلم علي المشاكل و نكتشفها و نحلها بدري او نتفاداها قبل ما تحصل. يعني لو عايز تشوف ايه ممكن يعطل الشغل و تقلل المشاكل يبقي تشتغل Agile.

و الAgile Mindset بتقوم علي قيم و مبادئ اتعرفت في الAgile Manifesto اللي مضي عليه اهم المؤمنين بال mindset دي في اجتماعهم في 2001 ، و دول مؤسسين طرق شغل الAgile المختلفة زي Scrum او Kanban او Extreme Programming اللي كلها بتطبق القيم و المبادئ دي

من الاخر Agile is a mindset اللي بتخلي الناس ينتجوا شغل احسن و اسرع و انسب للعميل عشان بتركز علي التجربة و الfeedback و التعليم و بتخليهم يعرفوا يتعاملوا مع التغيير بشكل احسن لانهم بيؤمنوا ان التغيير جزء من طبيعة عملهم .