Modern Agile – التطوير في القيم و الافكار

اتكلمنا كتير عن الagile manifesto و ايه اهمية الvalues و الprinciples اللي فيه ،  و زي ما احنا دايما بنقول agile is a mindset و دي اهم حاجة  و عشان احنا ناس agile يبقي لازم نتطور و نتعلم و نطور الagile ذات نفسه.
و الحقيقة انا مش بقتنع هنا بالعناوين القوية زي agile is dead و كده عشان في الاخر هي نفس الmindset  و بنطور في الطرق و الpractices لان ده الطبيعي و لازم يحصل.

الاتجاه الجديد دلوقتي رايح لناحية ال modern agile اللي اتكلم عنه Joshua Kerievsky في الkeynote بتاع Agile Alliance 2016 ، انا هحاول اغطي مواضيع الkeynote ده في كام مقال بس اكيد لو تشوفوه هيكون مفيد و مشوق اكتر و خصوصا بنته الامورة و هي بتتعلم ركوب العجل 🙂 .

و ال modern agile بيتكلم عن نفس الagile mindset  بس الاتجاه اننا نخلي الvalues اشمل و اعم من الmanifesto و يبقي بيشمل كل المجال اللي حوالين الsoftware و بيتعامل معاه ، و حتي المبادئ دي تصلح للناس اللي مش بتشتغل في الsoftware اصلا.

ده غير انه بقي بيتفادي بعض الاخطاء و المشاكل اللي الناس بتقع فيها و هي بتتعلم و تطبق الagile زي ان هم يركزوا علي الprocess اكتر من الmindset عشان كده ال modern agile مفيهوش تركيز علي خطوات قد ما هي افكار و مبادئ لا و كمان فيه اتجاه لقتل كانت مستخدمة كتير زي الstory points و الvelocity و الاتجاه لل continuous delivery model اللي مش محتاجين معاه planning و tracking كتير.

و كمان ال modern agile بيدمج افكار و طرق جديدة طلعت و تطورت بعد الmanifesto زي الاهتمام بالusability و الUX جدا و انه بقي من اساسيات شغل الsoftware ، و كمان فكر الLean Startup اللي بيعتمد علي التجربة و التعلم و بقي مهم جدا لأي حد بيعمل software مش بس الstartups ، و كمان الcontinous deployment techniques اللي خلت الresponse لل clients سريع جدا و قصرت الcycle بتاعت الlearning و الfeedback .هنلاقي هنا كتب كتير عن الافكار اللي اتبني عليها ال modern agile .

من التوجهات الكبيرة كمان هي الإعتماد بشكل كبير علي فكر الLean من Toyota في اليابان الي بيركز علي حاجتين مهمين هم ” احترام الناس Respecting People ” و “التطوير المستمر Continous Improvement” و هنلاقي مبادئ ال modern agile بيدوروا دايما حول الحاجتين دول.

طيب يا تري ال modern agile هيخترع  manifesto جديد و methodologies جديدة و نعيد كل حاجة من الاول  ، لا هو الحقيقة بيبعد عن الrules الكتير اللي ممكن الناس تركز عليها و تفقد القيم الاساسية للagile ، هم عايزين يعملوا حاجة سهلة للفهم و تركز اكتر علي الmindset  عشان كده عملوا sticker صغير فيه 4 قيم و بس.

و دول الاربع قيم بتوع ال modern agile و لو تلاحظوا هتلاقوا انهم متوافقين جدا مع الagile mindset اللي بتهتم بالناس و بالتعليم و تقديم قيمة مفيدة للsoftware اللي بنعمله و الfeedback و التطوير.

اعد اناسا رائعين  make people awesome

إجعل الأمان شرطا أساسيا Make safety a prerequisite

اكتشف سريعا و تعلم بالتجربة Experiment and Learn rapidly

انتج قيمة بشكل متواصل Create Value continuously

و زي ما قلنا اننا بنعتمد علي فكر الLean فأول اتنين بيهتموا قوي بمبدأ الLean بتاع Respecting people و الاتنين التانيين بيتكلموا عن مبدأ Continuous Improvement .

هنتكلم اكتر عن كل قيمة لوحدها بس خلينا ناخد حاجة بسيطة عنهم كلهم في الاول

اعد اناسا رائعين : يعني اننا نقدم قيمة للناس يخليهم احسن او رائعين في حياتهم و ده لكل الناس في الeco system من اول الusers اللي هحل ليهم مشكلة او need بالsoftware بتاعي لحد الفريق اللي هيشتغل كويس و يتعلم و الشركة اللي هتنجح اكتر ، الفكرة هنا ان كل الناس في الeco-system تكون awesome .

إجعل الأمان شرطا أساسيا : الامان انك تجرب و تتعلم ، الامان انك تتكلم عن المشاكل ، الامان انك تقول فكرة ، الامان انك تغير حاجة و واثق ان الكود مش هيضرب من كل حته ، الامان انك يبقي عندك فريق commited و تقدر تعتمد عليه ، لان الامان شرط اساسي في التعليم و التطوير و النجاح .

اكتشف سريعا و تعلم بالتجربة : طبعا التجربة هي احسن طريقة اننا نتعلم عن السوق و احتياجات العميل بشكل عملي ، و كمان الtechnology الجديدة لازم نجربها و نشوف تناسبنا ولا لا ، الفكرة هنا ازاي اعمل تجارب سريعة و صغيرة  و مفيدة و اعرف استفيد من نتايجها، لازم التجربة تبقي جزء مهم من الmindset بتاعتنا لما نيجي نبدأ حاجة جديدة او حد يقول فكرة او عندنا افتراض عايزين نعرف صح ولا لا.

انتج قيمة بشكل متواصل : اهم حاجة اني اركز علي القيمة اللي بقدمها ، بس التطوير هنا اني انتج قيمة بشكل متواصل و بسرعة لان الدنيا حاليا اسرع بكتير و المنافسين او العملا مش هيستنوا release كل سنة او كام شهر ، عشان كده ال modern agile بيركز قوي علي الcontinuous delivery  لانه بيخلينا نوصل للعملا بشكل سريع و يعتمد عليه و في نفس الوقت بيشيل من علينا شغل الplanning الكتير و الdeadlines و الكلام المرهق ده.

في الاخر ال values دول مترابطين ببعض و مش هينفع اطبق واحدة و اسيب التانية و في نفس الوقت تطبيقهم مش سهل ، خصوصا انهم مش مركزين علي خطوات او process ، الفكرة كلها هنا في التوازن  زي بنت joshau و هي بتتعلم ركوب العجل 🙂 ، انك توازن بين كل الناس و تحاول تخليهم كلهم رائعين او awesome و انك توازن بين انك تخلي الدنيا امان من غير معوقات كتير تعطل التجارب و الcontinuous delivery و اننا نجرب من غير ما نعطل او نبوظ الانتاج .

لسه هنكمل عن كل مبدأ بتفاصيله اكتر ، شوفوا الkeynote  و ادي كمان ال slides و طبعا المناقشات مرحب بيها جدا