Modern Agile إجعل الأمان شرطا أساسيا Make safety a prerequisite

إجعل الأمان شرطا أساسيا Make safety a prerequisite

تاني مبدأ و هو مرتبط قوي بالمبدأ الاول هو “إجعل الأمان شرطا أساسيا” او “Make safety a prerequisite” و هنا اول حاجة بتيجي في دماغنا هي الامان ان الموظفين يتكلموا مع مديرهم و يسمعهم بس الحقيقة ده جزء بس من الامان المقصود هنا .
الحقيقة اننا هنا نقصد ان الامان يبقي في ثقافة الشركة و يكون كل الناس حاسة بيه و مؤمنة بيه مش بس الموظفين لا كمان العملاء و  ، الموظف بيحس بالامان لما يبقي عارف ان هدف الشركة و مديره و زمايله ان الشغل يمشي باحسن طريقة مش كل واحد مستنيله علي الغلطة عشان يلومه او يخصمله ، العميل يحس بالامان لما يبقي عارف ان الشركة بتركز علي القيمة اللي بتقدمها ليه مش انها تاخد منه فلوس و بس و كمان يبقي عارف ان الشركة دي لو حصلتله مشكلة هتكون متحملة مسؤليتها فيها .

طيب ليه ده مهم ؟ عشان لو الشركة فيها ثقافة الخوف مفيش اي practice ولا process ولا tools و لا skills هتساعدك تتحرك لقدام لان اللي مش بيغلط مش بيتعلم و اللي مش بيتعلم مش بيتطور ولا يتحرك ، يعني ممكن يبقي عندك احسن skills بس خايفين يجربوا حاجة جديدة ليفشلوا و يقع عليهم اللوم ، او عندك مشكلة في الشغل و الفريق عنده فكرة ممكن يحلها بس خايف عشان محدش يقوله انت ازاي عملت كده ، او عميل غير راضي و الsupport معندوش الauthority انه يقدم حل حقيقي ، او عشان خايفين نقول estimate غلط نقوم نحط buffer كبير قوي، او عشان خايفين نقول اننا هنتأخر عشان محدش يلومنا نقوم مطلعين شغل مش tested كويس ،  او عشان خايفين يتقال اننا بتوع مشاكل و دوشة نقوم منتكلمش علي المشاكل ، او عشان خايفين من الاستهزاء او التسفيه نقوم منقولش افكارنا اللي ممكن تكون مفيدة ،  و الحقيقة كمان فيه علاقة كبيرة بين ثقافة الخوف و اللوم و الownership للفريق في الشغل و الproductivity بتاعتهم ، كل ما زاد الخوف كل ما الموظف بقي عايز ييجي يعمل اقل قدر من الشغل و يكون شغل سهل مفيش فيه مخاطرة عشان يقلل احتمالية انه يغلط و يبقي كل همه انه ازاي يرمي الغلط علي غيره و ازاي يرمي الشغل اللي ممكن يخليه يغلط علي حد تاني ، طبعا ده غير الstress اللي ممكن لما يزيد عن حد معين بيخلي الproductivity تقل بشكل كبير . في الاخر ثقافة الخوف بتخلي كل واحد يركز علي ازاي ميغلطش مش مصلحة الشغل ده غير انه بيقضي علي روح الفريق و يبقي بدالها روح كل واحد يرمي علي التاني او يبقي عندي شلة نغطي علي بعض عشان منغلطش ، في الاخر مصلحة الشغل مش بتكون اهم اولوية.

عشان كده في Google لما عملوا دراسة عن ايه اللي بيميز الفرق اللي الperformance بتاعها عالي ، لقوا ان اكتر حاجة مؤثرة هي الphyscological safety او الامان النفسي بمعني ان الفريق عنده استعداد انه ياخد risks و انهم متقبلين انهم يغلطوا او يحسوا انهم مش كفء بينهم و بين بعض .

احنا عايزين نوصل بالناس انها تكون في learnin zone زي ما هو واضح هنا

 فأول أشكال الأمان هنا هي الأمان انك تفكر و تتعلم ، تجتهد و جايز تفشل ، تجرب و تشوف النتيجة ، من غير الامان ده الفريق هيخاف يجتهد و يجرب و مش هيتعلم حاجة و ده اساس فكر الagile و اننا دايما محتاجين feedback و validation للي احنا بنعمله، طبعا الفريق محتاج  يتعلم ازاي يعمل تجارب و يستفيد من نتايجها بس في الاخر هيبقي عندنا فريق high performing و كمان جاهز للتحديات الجديدة اللي ممكن تقابله.

و عشان نحس بالأمان محتاجين نسمع بعض و نفهم بعض و نتقبل اراء بعض عشان كده لازم نركز ان الmeetings بتاعتنا تبقي phsycologically safe meetings و دي بنتأكد فيها ان الكل اتكلم و رأيه مسموع و مفيش تسفيه من حد و مفيش حد مسيطر علي الmeeting .

و كمان مهم قوي ان يبقي عندي نظام امان للناس و يكون مش بيسهل علي الناس تغلط ، يعني لما يبقي تركيزي كله علي الوقت و التسليم و مش بسمع الناس لما يقولوا لا الوقت ده مش هيكفي ،ده نظام بيدفع الناس انهم يغلطوا و يطلعوا شغل الquality بتاعته سيئة .و فيه حاجات كتير ممكن تلخبط و تغلط و هنا الautomation ليه دور مهم قوي الحقيقة ، كام مرة نزلنا build و قعدنا نلف و ندور عشان فيها مشكلة configuration حد غلط و نسيها او مش عارفها ، او لما حد يحب يجرب حاجة يبقي فيه risk عالي قوي فيخاف عشان مش عارف ايه اللي ممكن يضرب مع ان لو كنا اهتمينا اننا نعمل safety net من الtesting automation و الunit tests كنا قدرنا نجرب و نستفيد من الفرص.

اخر حاجة احب اضيفها اننا مش هنركز علي ال safety بس و نسيب بقية الprinciples و الا كده هنبقي مقيدين برده مش عارفين نتحرك بس لازم نعرف ان من غيرها مفيش تعليم ولا ثقة ولا فريق

يا ريت شوفوا الkeynote اللي الكلام ده متاخد منها  و ادي كمان ال slides و طبعا المناقشات مرحب بيها جدا