Agile in action ..التعامل مع الأخطاء

من المواقف اللي بنتعرضلها في المشاريع ان تحصل مشكلة او غلطة من حد زي مثلا لو فيه bug ظهرت متأخر أو فيه حاجة العميل طالبها و متعملتش . ساعتها هنتصرف ازاي كفريق و كإدارة ؟

حصل الموقف ده مع احد الفرق اللي كنت بشتغل معاهم ، جينا قبل نهاية المشروع و ال product owner و سأل علي جزء معين هيتسلم امتي ، جه الفريق قاله احنا مش حاطينه في ال plan و انت عارف الplan  معانا و شايف انها مش موجودة من الاول و انت قلت ان الجزء ده اقل اهمية و هنا بدأ الخلاف . و خلينا نتفق ان دي غلطة من حد فينا ، سواء الprodcut owner اللي مش بيراجع كل حاجة عنده مع الplan او الscrum master اللي مش بيراجع الplan مع الprodcut ower بشكل مفصل او غلطتي انا كcoach اني متأكدش ان كل واحد فاهم دوره و بيقوم بيه صح ، بس برده الفكرة هنا هنتصرف ازاي؟

أول حاجة الناس بتعملها هنا هي انهم يشوفوا مين الغلطان قبل ما يشوفوا المشكلة تتحل ازاي و خصوصا لو الإدارة بتشجع ده ، يجي المدير يقولك انا عايز حد يبقي مسئول عشان لما تحصل مشكلة اجيبه ، طيب و بعدين ، حتي لو جيبته و رفدته كدا المشكلة اتحلت ؟ طيب هو فيه حد واحد ممكن يحل المشكلة و لازم الفريق كله يشتغل عليها ؟ يعني لو المثال ده غلطة الprodcut owner مش الفريق هيتحمل معاه و يزود الشغل و لو غلطة الفريق مش الproduct owner هيشتغل معاهم عشان يشرح الجزء ده و كمان ممكن يكلم العميل انهم يتاخروا شوية ؟ في الاخر احنا لازم نحل المشكلة قبل ما نلوم بعض اولا عشان مصلحة الشغل و بعدين نحلل المشكلة عشان نتعلم منها و متتكررش تاني .

طيب لو مشينا في سكة اللوم و ان كل واحد يرمي المشكلة علي التاني ايه اللي ممكن يحصل و ايه علاقة الagile بالكلام ده ؟

طبعا احنا عارفين ان اهم حاجة في الagile هو الفريق زي ما بتقول اول قيمة في الagile manifesto

 Individuals and interactions over process and tools

و ان هدفنا اننا نبني فريق يبقي self organizing عشان هي دي الفرق اللي بتكونmotivated , commited , innovative و اهم حاجة انهم بيكونوا فاهمين ال business و مركزين علي مصلحة العميل . زي ما موجود برده في مبادئ الagile manifesto

Build projects around motivated individuals.
Give them the environment and support they need,
and trust them to get the job done.

The best architectures, requirements, and designs
emerge from self-organizing teams.

و طبعا ثقافة اللوم و رمي الأخطاء عمرها ما هتبني فريق زي ده بالعكس دي بتهد اللي بيتبني لانها بتحط الخوف مكان الثقة ، و بتخلي اهم حاجة عند الموظف انه ميغلطش مش مصلحة الشغل و هو ده اللي حصل بالظبط ، بعد ما حصلت المشكلة دي الفريق بقي الattitude بتاعه انه يخلص في الوقت بسرعة عشان محدش يلومه تاني حتي لو مش هيعملوا testing صح و بالتالي ممكن الدنيا تطلع بquality مش كويسة بس المهم محدش يلومنا و يقول انتو اللي ماخرين المشروع بعد ما كان الفريق ده عامل شغل كويس العميل شافه اكتر من مرة و كان مبسوط بيه ، كل ده عشان ضربنا مبدأ make safety a prerequisite بقي تحقيق الحاجات التانية صعب جدا.

اكيد مش بنقول مفيش كلام في الخطأ بس الفكرة في هدف الكلام اولا هل هي حل المشكلة و التعلم منها ولا هي اننا نلاقي حد يشيل الليلة و خلاص ؟ عادة الأخطاء دي بتكشف مشكلة في تواصل الفريق او نظام الشغل حلها بيكون مهم جدا عشان نضمن عدم تكرارها مش نضمن اننا مش هنكرر الغلط لاننا مش هنجرب او ان كل واحد هيبقي مامن نفسه ازاي يطلع من الغلط و بس .